Nag-atubang og kaso sa paglapas sa Anti-Photo and Video Voyeurism Act (RA 9995), Anti-Violence Against Women and Their Children Act (RA 9262), ug Grave Threat ang usa ka lalaki human masikop sa entrapment operation sa Malaybalay City, Bukidnon.
Gipahigayon ang operasyon sa Sabado sa hapon, Hulyo 5, ning tuiga, sa Public Terminal, Barangay 9, Malaybalay City, pinasikad sa reklamo sa biktima nga iyang kanhing live-in partner. Ang suspetsado nailang si alyas Danilo, 55 anyos, walay trabaho ug residente sa Damulog, Bukidnon.
Sumala sa imbestigasyon, gihulga sa suspetsado ang biktima nga ipakatap sa social media ang ilang malaw-ay nga video ug litrato. Gibutyag usab sa biktima nga nakasinati siya og emotional abuse sa ilang relasyon. Sa entrapment operation, nakumpiskar gikan sa suspetsado ang upat ka cellphone, lima ka memory card, pito ka sim card, usa ka flash drive, duha ka camera, upat ka micro SD adapter, ug school ID sa biktima.
Sa pagkakaron, temporaryong nakapreso ang suspetsado sa Malaybalay City Police Station samtang gihikay ang pormal nga pagsaka sa mga kasong iyang giatubang.