Gipakusgan sa Malaybalay City Police Station ang police visibility ug nagkadaiyang operasyon batok sa ilegal nga droga, smuggled cigarettes, ug uban pang criminality alang sa pagpreserba sa kalinaw sa dakbayan.
Pinaagi sa pahayag ni PLTCOL Ariel Philip Pontillas, Officer-in-Charge sa Malaybalay CPS, prayoridad karon sa kapulisan ang crime prevention ug crime solution pinaagi sa mas aktibong foot patrol ug gihasang operasyon. Subay sa gipagawas nga accomplishments gikan Oktubre 5 hangtod 11, nasikop ang duha ka babaye sa anti-illegal drug operation sa Barangay 9, samtang lima ka wanted persons usab ang nadakpan lakip na ang usa ka most wanted person nga nag-atubang og lima ka kaso sa pagpanglugos.
Nakahimo usab ang kapulisan og operasyon batok sa smuggled cigarettes, illegal fishing, ug illegal mining. Dugang pa ni Pontillas, gipahugtan na ang pagbantay sa mga tunghaan ug kadalanan labi na sa kagabhion, samtang andam na usab ang mga lakang alang sa seguridad sa pormal nga pag-abot sa panahon sa Pasko.