Diha sa ika-13 nga semana sa impeachment trial batok kang Vice President Sara Duterte, nakasentro ang paglitis sa giingong dili maipasabut nga kabtangan sa Bise Presidente subay sa gipagawas nga records sa Securities and Exchange Commission (SEC).
Diha sa pagpaatubang ni SEC Lawyer Gerardo Del Rosario, gipadayag niini nga nalambigit ang kanhi Special Envoy to China nga si Jaime Tan Cruz sa mga korporasyon nga gipanag-iyahan ni VP Sara. Gipamatud-an usab sa SEC nga ang pagdaghan sa kabtangan sa Bise Presidente dili pwedeng gikan sa maong mga kompanya tungod kay kadaghanan niini nalugi ug walay audited financial statement. Apan gihatagan og pagtagad sa depensa nga dili lang SEC ang posibleng tinubdan sa lehitimong kaadunahan sa Bise Presidente.
Samtang, giusisa usab ang GenCorp Industries nga nalakip sa SALN ni VP Sara diin nakakuha kini og 49 ka kontrata sa gobyerno nga nagbalor og ₱34.2 milyon gikan sa Dakbayan sa Dabaw. Gikumpirma sa igsoon sa VP nga si Davao City Mayor Sebastian “Baste” Duterte ang maong mga kontrata, apan gipahayag niini nga walay pangalang “Duterte” sa mga opisyal nga dokumento ug wala siya’y kasayuran sa kalambigitan niini sa iyang igsoon.
Sa laing bahin, giaprubahan sa Senate Impeachment Court pinaagi sa botong 13-1-6 nga ibase lamang sa mga senador nga nakatambong ang two-thirds voting threshold alang sa conviction o acquittal. Nakatakdang ipaatubang isip testigo si Mayor Baste human kini mapagawasan og subpoena, habig sa nagpadayon nga paglitis nga mahimo nang tibuok adlaw sugod karong Huwebes, Oktubre 1.