Gilauman nga magpadayon pa sa dili ubos sa tulo ka adlaw ang mga katag-katag nga pag-ulan ug pagpangdugdug sa lalawigan sa Bukidnon ug sa mga silingang dapit tungod sa Intertropical Convergence Zone (ITCZ).
Sa pakighinabi sa Bombo Radyo, gipatin-aw ni PAGASA-Malaybalay Weather Specialist I Raul Montilla nga wala na’y direktang epekto sa nasud ang Severe Tropical Storm nga si “Fumi” nga nahimutang 600 kilometros sa sidlakan-amihanang-sidlakan sa Itbayat, Batanes, kay gilauman kini nga mogawas sa Philippine Area of Responsibility (PAR) sulod sa 24 oras. Apan ang ITCZ ang nag-unang nagdala og mapanganuron nga kalangitan ug pag-ulan sa Mindanao, ilabina sa Dakbayan sa Malaybalay ug Valencia.
Gidugang usab ni Montilla nga nagpabilin nga ubos ang heat index sa probinsya tungod sa sige nga pag-ulan. Hinuon, nagpahimangno ang PAGASA sa mga nagpuyo sa mga ubos nga dapit nga daling bahaan ug sa mga daplin sa kabukiran nga risgo sa pagdahili o pagkahunlak sa yuta nga mag-amping ug kanunayng magsubay sa mga pahimangno gikan sa kagamhanang lokal.