Naghatag ug kabalaka sa pipila ka residente sa usa ka barangay sa Malaybalay City human misulod sa ilang kabalayan ang baha gikan sa kalit ug kusog nga ulan. Kagahapong adlawa pasado alas 2 sa hapon, naapektuhan ang mga kabalayan sa Barangay Casisang, ilabi na sa Mamala ug Avinca nga lugar, human misaka ang tubig tungod sa kalit nga pagbundak sa ulan. Matod ni Barangay Kapitan Gregorio Jaroy, kusog kaayo ang ulan nga misangpot sa pagbaha sa mga lugar nga prone na sa pagbaha.
Gideklara dayon sa kapitan ang pagdoble sa pagbantay sa mga lugar nga dali mabaahan pinaagi sa mga BPSO aron masiguro ang kahimtang sa mga residente. Wala may dagkong kadaot nga natala apan nakaapekto sa pipila ka kahayupan sama sa mga baboy ug baktin na nangaanod, gipahimangnoan gihapon ang katawhan sa pagpabiling alerto batok sa posibleng pagbaha kon magpadayon ang kusog nga ulan. Nagpadayon ang monitoring sa barangay aron malikayan ang dako nga kadaot ug masiguro ang kaluwasan sa katawhan.