Gipasidaan sa PAGASA Northern Mindanao ang publiko bahin sa gipanglantawang mga kalit nga pag-ulan, kilat, ug pagpanugdog sa hapon ug gabii sa probinsya sa Bukidnon ug silingang mga dapit tungod sa trough sa Low Pressure Area (LPA) nga naglihok sa gawas sa Philippine Area of Responsibility (PAR).
Sa pakighinabi sa Bombo Radyo kang Arianne Sioson, Weather Specialist sa PAGASA Northern Mindanao, gipadayag niini nga ang maong LPA nga gipanglantawang makasulod sa PAR sa mga sunod nga adlaw ang nagdala usab og pagdag-um ug pag-ulan sa amihanang bahin sa rehiyon. Dugang pa ni Sioson, nagpadayon ang strong El Niño nga nagpatugbaw sa kainiton sa temperatura nga niabot sa 33°C sa probinsya.
Samtang bahin sa nabangitan nga haze o baga nga aso nga nidala og pagpanag-om sa kawanangan sa Northern Mindanao, gipatin-aw sa PAGASA nga gikan kini sa wildfire o pagkasunog sa kakahoyan sa Indonesia tungod sa dagan sa hangin gikan sa habagatan. Gipaabot nga moarang-arang ang kalidad sa hangin sa mga sunod nga adlaw, samtang gipahimangnoan gihapon sa DENR-EMB ug PAGASA ang publiko nga magpabiling hydrated, magdala og payong, ug magsul-ob og face mask alang sa mga dunay sensitibong panglawas.