Nipukaw og dakong pagtagad ang Filipina tennis star nga si Alex Eala human nitambong sa front row sa nagkalainlaing sikat nga pasundayag sa moda atol sa New York Fashion Week sa Estados Unidos.
Nakatapad ni Eala ang mga iladong personalidad sa tibuok kalibutan sama nilang kanhi Vogue editor Anna Wintour, Hollywood actress Amanda Seyfried, ug K-pop star Jungkook sa BTS atol sa mga runway presentation sa mga prestihiyosong brand sama sa Tory Burch, Michael Kors, ug Calvin Klein. Gipahayag sa batan-ong atleta nga dako ang iyang kalipay sa maong kasinatian, samtang gipasabot nga ang natad sa sports ug moda parehong maayong paagi sa pagpadayag sa kaugalingong personalidad.
Kasunod sa iyang mga kalihokan sa New York pagkahuman sa US Open, ibalik usab ni Eala ang iyang bug-os nga pokus sa pagbansay alang sa Singapore Open ug sa pagatubangon nga Asian Games sa Nagoya, Japan.