Gipahunong una sa Commission on Elections (COMELEC) Region 10 ang pagpahigayon og oryentasyon alang sa mga magtutudlo samtang nagpaabot sa pormal nga desisyon sa Kongreso bahin sa gisugyot nga pag-oktaba sa Barangay ug Sangguniang Kabataan Elections (BSKE), taliwala sa subsub nga pagsupak sa mga botante sa Malaybalay City.
Sa pakighinabi sa Bombo Radyo, gipahayag ni COMELEC-10 Regional Director Atty. Renato Magbutay nga nahuman na ang pag-imprenta sa mga balota nga gidesinyo nga generic aron dili mausik kon ugaling maoktaba man ang piliay. Gipasabot usab sa opisyal nga ang matag pag-oktaba sa petsa sa piliay naghatag og dugang nga kabug-at sa gasto sa kagamhanan tungod sa pagdugang sa kapin 3.2 ka milyon nga rehistradong botante ug mga presinto sa Rehiyon 10.
Sa pikas nga bahin, pultang gipadayag sa mga residente sa Barangay Sumpong sa dakbayan sa Malaybalay ang ilang pagsupak sa pag-oktaba sa maong piliay. Sumala sa mga botante, nakahatag na og igong panahon ang kagamhanan sa mga kasamtangang opisyal ug panahon na aron ipagawas ang katungod sa pagpili aron mailisan ang mga opisyal nga nagulang sa serbisyo ug mapadayon ang mga naghatag og tinuod nga kaayohan sa katilingban.