VALENCIA CITY, BUKIDNON / CRIME & DRUGS — Mokabat sa kapin ₱41,000 nga balor sa gidudahang shabu ang nakumpiska habig nga usa ka 50-anyos nga babaye ang nasikop sa gipahigayon nga drug buy-bust operation sa Barangay Lumbo, Valencia City kaniadtong Martes sa kadlawon, Setyembre 8.
Giila ang nasikop nga suspek nga si alyas “Inggang”, nga nakatala sa kapolisan isip street-level individual. Subay sa report gikan sa Bukidnon Police Provincial Office sa pamunoan ni Provincial Director PCOL Oliver Sotto Navales, gipahigayon ang maong joint operation sa Valencia City Police Station Drug Enforcement Unit, 2nd Bukidnon PMFC, ug City Anti-Drugs Special Unit Team sa Purok 1B sa maong barangay.
Nakuha gikan sa suspek ang tulo ka sachet sa gidudahang shabu nga nagtimbang og 6.1 gramos ug adunay standard drug price nga ₱41,480.00, lakip na ang usa ka android cellphone, pitaka, ug buy-bust money. Ang nasikop kasamtangang gitanggong na sa selda sa Valencia City Police Station ug nag-atubang sa pormal nga kasong paglapas sa Republic Act 9165.