Nagpagawas og bag-ong pahimangno ang usa ka environmental group nga Ban Toxics ngadto sa publiko bahin sa posibleng peligro ang dala sa pipila ka dekorasyon ug Christmas lights karong nagsugod na ang mga “Ber” months ug nagkadaghan na ang mga palamuti nga gibaligya sa merkado.
Gibutyag sa maong grupo ang kahinungdanon sa pagtan-aw pag-ayo sa label ug kompleto nga impormasyon sa produkto aron masiguro nga luwas ang mga materyales nga gigamit ug nga nakasunod kini sa mga sumbanan sa kaluwasan nga gitakda sa gobyerno.
Gipahimangnoan usab sa grupo ang mga konsumante batok sa pagpalit og substandard o dili kasaligan nga Christmas lights, tungod kay mahimo kining dali nga mo-init o mag-overheat ug mahimong hinungdan sa sunog sa panimalay.
Gipahinumdoman usab ang publiko nga dili lamang ang barato nga presyo ug nindot nga disenyo ang angay tan-awon sa pagpili og mga dekorasyon.