Subling nakatala og world record ang 41-anyos nga si Damian Kasprzyk sa Poland human kini makalahutay og 1 oras ug 29 segundos nga nakalubog sa tubig nga puno og yelo.
Tungod niini, nakab-ot ni Kasprzyk ang Guinness World Records title alang sa longest duration submerged in ice water (male).
Nalabwan niya ang kanhing record nga 58 minutos nga gitakda usab sa usa ka Polish nga si Valerjan Romanovski niaging tuig.
Dili na bag-o kang Kasprzyk ang mga challenge nga may kalabotan sa grabeng katugnaw.
Nakahupot na usab siya og world record human magpabilin sa snow sulod sa kapin duha ka oras, ug rekord usab alang sa pinakataas nga full-body contact with ice human maputos ang iyang tibuok lawas sa yelo sulod sa 5 oras, 1 minuto ug 33 segundos.
Matod ni Kasprzyk, mas lisod ang iyang bag-ong record attempt tungod kay mas paspas mawala ang kainit sa lawas kung nakalubog sa tubig, ilabi na sa bahin sa ulo.
Limitado usab ang komunikasyon niya sa iyang team atol sa challenge ug nakasinati pa sila og problema sa pipila ka kagamitan sa pagsugod.
Bisan pa niini, malampuson niyang nahuman ang challenge ug nahimo kining iyang ikatulong cold endurance world record.