Nangayo ang Department of Agriculture (DA) ug National Irrigation Administration (NIA) og dugang nga pondo alang sa sunod tuig aron maandam ang sektor sa agrikultura sa posibleng epekto sa El Niño sa nasud.
Matud ni Agriculture Secretary Francisco Tiu Laurel Jr., gikinahanglan ang dugang nga pondo alang sa mga proyekto sa DA tungod sa posibilidad sa pagbalik sa El Niño ug sa epekto niini sa mga mag-uuma ug mangingisda.
Lakip sa gipangayo sa kalihim ang pagdugang sa Presidential Assistance for Farmers and Fisherfolk o PAF, nga posibleng mahutdan og pondo sa mosunod nga mga bulan tungod usab sa epekto sa habagat ug mga bagyo.
Gipangayo usab sa DA ang P8.7 bilyon alang sa fertilizer assistance sa mga mag-uuma, samtang nagkinahanglan og dugang P10 bilyon hangtod P12 bilyon ang Bureau of Fisheries and Aquatic Resources o BFAR alang sa mga programa alang sa mga mangingisda.
