Naangol ang usa ka 60-anyos nga lalaki human gitigbas sa iyang kaugalingong 20-anyos nga umangkon taliwala sa ilang pag-inumay sa Barangay Kibenton, lungsod sa Impasug-ong niadtong Lunes sa gabii, Agosto 31, 2026.
Subay sa imbestigasyon sa Impasug-ong Municipal Police Station sa panguna ni PCPT Keir Jhon R Hallasgo, nag-inumay ang biktima ug ang suspek sa dihang miulbo ang usa ka init nga lalis tali sa duha. Sa kalit nga kasuko, gikuha sa suspek ang usa ka sundang ug gitigbas ang biktima diin naigo kini sa wala nga kamot.
Gidali pagdala ang biktima sa Bukidnon Provincial Hospital sa Malaybalay City alang sa medikal nga pagtambal. Kasamtangan namang gitanggong sa Impasug-ong MPS ang suspek alang sa pormal nga pagpasaka og kaso human kini dali nga nasikop sa mga barangay tanod ug kagawad diin narekober usab ang sundang nga gigamit sa maong pagpanigbas.