Nakaplagang wala na’y kinabuhi ang usa ka 58-anyos nga lalaki sulod sa iyang pinuy-anan sa Zone 2, Barangay Kinawe, lungsod sa Libona, Bukidnon niadtong Lunes sa buntag, Agosto 31, 2026.
Subay sa imbestigasyon sa Libona Municipal Police Station sa puyod ni PCPT Erwin James Tabequero, usa ka 56-anyos nga silingan ang nakadiskubre sa bangkay human niya nabatikdan nga wala gihapon mogawas ang biktima sa iyang balay sukwahi sa iyang naandang rutina. Sa pagtan-aw sa maong silingan, nakit-an ang biktima nga naghigda sa salog duol sa hugasanan nga wala na naglihok ug adunay dugo sa ilong ug baba.
Gipahayag sa Bukidnon Police Provincial Office (Buk PPO) nga adunay gihambin nga sakit nga pneumonia ug diabetes ang biktima ug nag-atiman kini sa iyang panglawas pinaagi sa mga maintenance nga tambal. Gitino sa doktor gikan sa RHU-Libona nga namatay sa natural nga hinungdan o sakit ang biktima ug walay nakit-ang timaan sa foul play sanglit intact ug wala hilabti ang iyang mga personal nga gamit. Gitugyan na ang bangkay ngadto sa iyang pamilya alang sa saktong paglubong.