Usa ka Nigerian inventor gikan sa Kano State ang nakahimo og smart glasses nga gidesinyo aron makatabang sa mga tawo nga adunay visual impairment sa ilang adlaw-adlaw nga paglihok ug pag-navigate.
Ang maong device nga gihimo ni Khalifa Aminu naggamit og artificial intelligence, sensors ug GPS aron makatabang sa pag-ila sa mga babag, butang ug ubang elemento sa palibot sa nagsul-ob niini.
Dugang pa, adunay location-tracking feature ang glasses nga mahimong gamiton aron mahibal-an ang nahimutangan sa user. Kung kini masaag o mawala, posible usab nga mapadala ang lokasyon ngadto sa caregiver pinaagi sa WhatsApp o email.
Padayon pa ang pagpauswag ni Aminu sa teknolohiya, ilabina sa pagdugang sa AI ug voice features. Pinaagi niini, mahimong makahatag ang device og tingog nga mga pahibalo ug impormasyon bahin sa palibot sa user sa tinuod nga panahon.
Tumong sa imbensyon nga magamit ang modernong teknolohiya aron mas luwas ug mas independente ang paglihok sa mga tawo nga dili makakita, samtang maminusan ang ilang pagsalig sa walking cane o kanunay nga tabang gikan sa ubang tawo.