Gidakop sa kapulisan ang usa ka 15-anyos nga estudyante nga gituohang nagpaluyo sa pagpakaylap sa hulgang pagpamusil batok sa mga estudyante ug personahe sa pipila ka tunghaan sa Valencia City, Bukidnon.
Sa usa ka pakighinabi sa Bombo Radyo Malaybalay kang former Valencia City Mayor ug consultant nga si Jun M. Galario Jr., gipahayag niini nga gilayon nga mipagawas og direktiba si Mayor Amie Galario alang sa pagpalig-on sa seguridad sa mga eskwelahan ug sa pag-trace sa nagpost human makita sa social media ang maong hulga.
Nailhan ug nadakpan sa kapulisan sa mubo lamang nga panahon ang suspek nga residente sa Poblacion, Valencia City. Kasamtangan na kini nga anaa sa kustodiya sa mga awtoridad samtang gina-estudyo pa ang gigamit nga social media account ug tibuok detalye sa maong insidente.
Tungod kay menor de edad ang nadakpan nga estudyante, pormal usab nga giapil ang City Social Welfare and Development Office (CSWDO) alang sa sakto nga pagdumala sa legal nga proseso subay sa balaod.
Padayon ang hugot nga koordinasyon tali sa kapulisan, DepEd, ug lokal nga kagamhanan sa Valencia City alang sa pagpataas sa seguridad sa mga eskwelahan, samtang gipahinumdoman usab ang mga ginikanan nga bantayan ang ilang mga anak ug ang mga estudyante nga motuman sa lagda sa seguridad.