Nakahuman sa 30 ka adlaw nga trabaho ubos sa Government Internship Program o GIP sa Department of Social Welfare and Development Field Office 10 ang 100 ka in-school youth sa Northern Mindanao.
Gipahigayon ang programa atol sa ilang summer break, diin nakakuha sila og aktuwal nga kasinatian sa serbisyo publiko ug nakadawat usab og pinansyal nga tabang alang sa ilang mga panginahanglanon sa edukasyon.
Gideploy ang mga intern sa DSWD-10 Regional Office ug sa 12 ka lokal nga pangagamhanan sa Northern Mindanao aron motabang sa administratibong buluhaton, mga programa, ug logistics sa nagkalain-laing government offices ug social welfare settings.
Lakip sa mga lugar nga ilang gideployan ang Cagayan de Oro City, Misamis Oriental, El Salvador City, Iligan City, Lanao del Norte, Oroquieta City, Ozamiz City, Gingoog City, Valencia City, Malaybalay City, Bukidnon, ug Camiguin.
Tumong sa GIP nga mahatagan ang mga kabatan-onan og kahigayonan nga makasinati sa aktuwal nga trabaho sa gobyerno samtang makatabang usab sa ilang pinansyal nga panginahanglan isip mga estudyante.