Gipadayag ni Senador Panfilo “Ping” Lacson nga nakit-an nila ang pipila ka “kwestiyonable” nga lump sum appropriations alang sa mga infrastructure projects sa gisugyot nga P7.2-trilyong national budget alang sa 2027.
Matud ni Lacson, pangayuan nila og detalye ug klarong pagpasabot ang maong mga pondo, nga mahimo usab hisgutan atol sa Development Budget Coordination Committee o DBCC briefing sa Agosto 27.
Gipasabot ni Lacson nga ang lump sum appropriation mao ang kinatibuk-ang pondo nga gigahin alang sa usa ka proyekto o programa nga walay detalyadong breakdown kung asa ug giunsa paggasto ang pondo.
Samtang, gipasalig ni Senate Finance Committee Chairman JV Ejercito nga dili niya tugotan ang mga budget insertion atol sa bicameral conference committee kung wala kini gilakip sa budget version sa Senado o sa House of Representatives.
Gidasig usab ni Manila Representative Benny Abante ang pagbalik sa livestream sa Bicameral Conference Committee proceedings, aron masiguro nga makita sa publiko kung asa gikan, asa gigamit ug kinsa ang nagpatuman sa mga pondo sa national budget.