Gipahayag ni US President Donald Trump nga mas gipili sa Estados Unidos ang pagpahamtang og presyur sa ekonomiya ug sanksyon batok sa Iran kaysa sa paglunsad og bag-ong aksyong militar o pagpadali sa negosasyon.
Sa usa ka pakighinabi, gipadayag ni Trump nga nag-atubang karon ang Tehran og grabeng inflation ug pagkahurot sa ilang pondo tungod sa gipatuman nga mga sanction ug blockade sa ilang mga dunggoanan. Bisan pa man nagpabilin ang opsyon sa militar, gipasabot sa Presidente sa US nga mas maayong pasagdan una ang Iran nga mag-atubang sa ilang dakong krisis sa pinansyal.
Taliwala niini, gihulagway sa Foreign Ministry sa Iran ang maong lakang sa US nga usa ka “pag-atras” gikan sa diplomasiya, ug gipahayag nga dugay nang nakasugakod ang ilang nasod batok sa mga gipahamtang nga sanksyon sa Washington.