WORLD — Gibarugan sa Iran nga manatiling sirado ang estratehikong Strait of Hormuz samtang dili dawaton sa Estados Unidos ang ilang mga kondisyon alang sa pagtapos sa gubat ug kagubot sa rehiyon.
Sumala kay Mohsen Rezaei, ang secretary sa Supreme National Security Council sa Iran, kinahanglang ihunong sa US ang gubat, ipagawas ang gi-freeze nga mga asset sa Iran, ug iapil sa kasabutan ang pagtapos sa gubat sa Lebanon ug Gaza. Tungod sa maong baruganan, nagpadayon ang pagsaka sa presyo sa lana sa tibuok kalibotan tungod sa kabalaka sa suplay sa crude oil ug liquefied natural gas (LNG) nga nagaagi sa maong gipang-aagihan sa dagat.
Sa kasamtangan, nagpadayon ang diplomatikong paningkamot sa mga nasod sa Pakistan, Qatar, ug Oman aron ma-establisar ang pormal nga negosasyon tali sa US ug Iran ug mapadali ang pagkab-ot sa usa ka kasabutan.