Gipamugos ni House Deputy Speaker Janet Garin ang panginahanglan sa transparency ug accountability sa paggamit sa confidential funds sa gobyerno, ilabina sa mga alegasyon nga nalambigit sa paggamit sa maong pondo sa Office of the Vice President.
Matud ni Garin, mamahimong taguan ang personalidad sa mga informant alang sa siguridad, apan dili lakip niini ang resulta o output sa paggamit sa confidential funds.
Hugot nga gipasabot niini nga kinahanglan nga adunay klarong resulta ang matag paggasto sa maong pondo.
Gipasabot ni Garin nga ang confidential fund gitumong sa pagkuha og impormasyon nga makatabang sa pagsubay sa mga krimen sama sa droga, kidnapping ug mga scam.
Apan kinahanglan nga ang mga nakuhang impormasyon mahimong adunay konkretong resulta o aksyon.
Matud pa niini, kung adunay intelligence operation sa mga eskwelahan, pananglitan, kinahanglan nga mahibal-an ang mga nagbaligya og droga, ilang mga supplier ug, kung mahimo, ang tinubdan niini.
Samtang, sa pangutana kabahin sa giingong pagpagawas ug pag-apod-apod sa confidential funds sa kanhi OVP security chief nga si Colonel Raymond Dantillachica, gisulti ni Garin nga importante ang testimony niini sa impeachment proceedings.
Tungod niini, gipasabot usab ni Garin nga ang impeachment trial usa ka oportunidad alang sa usa ka giakusahan nga opisyal nga mapamatud-an ang iyang panig ug matubag ang mga alegasyon batok kaniya.