Gikabalak-an sa National Grid Corporation of the Philippines o NGCP ang hulga sa nipis sa power reserve sa Mindanao Grid, hinungdan nga gipatuman ang Yellow Alert ug nagpabiling posible ang power interruption sanglit mosobra ang panginahanglan sa available nga suplay.
Matud ni NGCP spokesperson Mae Roselle L. Curiano, adunay 2,779 megawatts available capacity samtang 2,689 megawatts ang peak demand, busa 90 megawatts na lamang ang operating margin.
Bisan tuod og igo pa ang suplay sa kasamtangang panginahanglan, mahimong magkaproblema kung adunay kalit nga mapalong nga power plant o mosaka pag-ayo ang demand. Â
Gipasabot ni Curiano nga gikinahanglan ang reserve aron dali nga mapulihan ang generating units nga mo-undang o ma-offline aron mapabiling balanse ang suplay ug panginahanglan.
Apan sa pagkakaron, aniya, anaa lamang sa palibot sa 90 megawatts ang operating margin sa Mindanao Grid.
Matud pa ni Curiano, dili pirmi pareho ang available supply ug demand tungod kay nagdepende kini sa aktuwal nga output sa mga planta ug sa konsumo sa mga panimalay ug negosyo.
Kung mokunhod ang generation samtang mosaka ang paggamit sa mga air conditioner, electric fan ug uban pang appliances, mahimong malapas sa suplay ang panginahanglan.