Gipasalig sa Department of Agriculture (DA) nga ipadayon sa gobyerno ang programa nga nagtanyag og bugas sa P20 matag kilo alang sa mga kwalipikadong benepisyaryo hangtod matapos ang termino ni Presidente Ferdinand Marcos Jr. sa 2028.
Matud sa DA, determinado ang ahensya nga mapadayon ang maong programa aron mapagaan ang gasto sa pagkaon sa mga Pilipinong nanginahanglan og suporta.
Kahinumduman nga atol sa State of the Nation Address, gipahayag sa Presidente nga kapin 12 milyon na ka Pilipino ang nakabenepisyo sa “Benteng Bigas, Meron Na,” nga gitumong ilabina sa mga sektor nga mas nanginahanglan og barato nga pagkaon.
Gipahibalo usab sa DA nga kapin 500 mil ka metriko tonelada ang kasamtangang imbentaryo sa bugas sa NFA, nga gilaumang igo aron masuportahan ang padayong operasyon sa programa.
Gikan sa 807 ka Kadiwa sites nga naglihok karon sa nagkadaiyang bahin sa nasud, plano sa DA nga palapdan pa kini ug mahimong mokabat sa 1,500 hangtod 2,000 ka sites sa mosunod nga mga bulan.