Subling gihulga sa seguridad ang Malaybalay City National Science High School (MCNSHS) human nakadawat og mensahe sa pagpamusil o shooting threat ang mga estudyante gikan Grade 7 hangtod Grade 12 pinaagi sa Messenger.
Sa pakighinabi sa Bombo Radyo Malaybalay gipatin-aw ni School Principal III Pastor II P. Abejuela nga nadawat sa mga estudyante ang hulga kaganihang alas-10:00 sa buntag. Dinalian nilang gipatuman ang emergency protocol pinaagi sa pag-lock-in sa mga klasehanan samtang gipasusi sa Philippine National Police (PNP) ug BPSO ang tibuok eskwelahan.
Human gideklarar sa kapulisan nga luwas ang kampus ug walay nakitang armas, gipadayon ra ang mga klase sa hapon, bisan pa man adunay pipila ka mga ginikanan nga mikuha sa ilang mga anak gamit ang opisyal nga pagpirma ug pagpasa sa ID.
Gibutyag usab ni Abejuela nga ang gigamit nga Messenger account mao ra gihapon ang nagpadala og bomb threat sa mga magtutudlo niadtong Hulyo 27. Gitunol na sa PNP Anti-Cybercrime Division ang imbestigasyon taliwala sa anggulo nga posibleng na-hack o gigamit sa uban ang maong account.
Sa kasamtangan, gipakusgan sa MCNSHS ang police visibility lakip ang pagpahigayon og surprise inspections gamit ang metal detectors diin aduna na silay nakumpiska nga mga brass knuckles, kutsilyo, ug vape. Naghangyo usab ang administrasyon sa kooperasyon sa mga ginikanan alang sa kaluwasan sa kapin 2,271 ka mga estudyante.