Misaka ang Philippine Stock Exchange index o PSEi ug milig-on usab ang piso batok sa US dollar niadtong Miyerkules tungod sa bargain hunting ug positibong pagsalig sa mga mamumuhunan.
Misaka ang PSEi og 0.78 porsyento ngadto sa 6,353.04 puntos, samtang ang All Shares Index mitaas og 0.59 porsyento ngadto sa 3,447.34 puntos.
Nanguna sa pagsaka ang Holding Firms, gisundan sa Property, Industrial, Financials ug Services, samtang ang Mining and Oil lamang ang nakasinati og pagkunhod.
Sumala sa Philstocks Research, nakahatag usab og positibong epekto ang pamahayag ni Bangko Sentral ng Pilipinas o BSP Governor Eli Remolona nga dili pa gilauman ang agresibong paghugot sa monetary policy sa duol nga panahon.
Bisan pa niini, nagpabiling mabinantayon ang mga investors tungod sa tensyon tali sa Iran ug Estados Unidos, ingon man sa umaabot nga mga polisiya sa US Federal Reserve.
Samtang, milig-on ang piso ug misira sa ₱61.41 kada US dollar gikan sa ₱61.61 niadtong miaging adlaw. Misaka usab ang trading volume ngadto sa USD1.62 bilyon.