Nasakmit sa Police Regional Office-10 (PRO-10) ang kapin ₱1.1 milyones kantidad sa gituohang shabu ug nadakpan ang tulo ka suspetsadong drug personalities, lakip ang duha ka High-Value Individuals (HVI), sa managlahing buy-bust operations sa Brgy. Lumbia, Cagayan de Oro City niadtong milabay’ng adlaw.
Sa unang operasyon, nadakpan si alias “Pet-pet,” 35 anyos, ug nakumpiskahan og 50 gramos nga gituohang shabu nga nagkantidad og ₱340,000.
Sa laing operasyon, nadakpan usab sila alias “Chan,” 37 anyos, ug alias “Rolf,” 45 anyos, diin nasakmit ang kapin 115 gramos nga gituohang shabu nga adunay kantidad nga ₱782,000.
Gikatahong dunay kinatibuk-ang kantidad nga ₱1.122 milyones ang iligal nga droga nga nasakmit sa duha ka operasyon.
Samtang sa pagkakaron, gipasakaan na og kaso ang mga suspetsado tungod sa paglapas sa Republic Act 9165 o Comprehensive Dangerous Drugs Act of 2002.