Gipahayag sa Department of Justice (DOJ) nga ilang girespeto ang lakang sa National Bureau of Investigation (NBI) sa paglunsad og imbestigasyon kalabot sa giingong mga iregularidad sa 2019 Southeast Asian (SEA) Games.
Sumala ni Justice Spokesperson Atty. Raphael Niccolo “Polo” Martinez, giila sa kagawaran ang mandato ug ang operational independence sa NBI sa pagpahigayon og imbestigasyon, bisan pa man og usa kini ka attached agency sa DOJ. Gipasalig usab ni Martinez sa publiko ug ngadto kang Senator-Judge Pia Cayetano nga ang aksyon sa kawanihan nakabase lamang sa balaod ug walay gidapigan.
Kini human mikuwestiyon ang magsuong Senator-Judges Pia ug Alan Peter Cayetano sa motibo ug timing sa maong imbestigasyon dungan sa nagpadayong impeachment trial ni Vice President Sara Duterte, diin matud pa nila usa lamang kini ka pamaagi aron mabalda o ma-distract ang mga mambabatas sa Senado.
Depensa usab ni NBI Director Atty. Melvin Matibag, “incidental” lamang ang paglunsad sa imbestigasyon human sila nakadawat og mga dokumento ug impormasyon gikan sa BCDA dungan sa paggahin og luna alang sa itukod nga NBI Academy didto sa maong sports complex.