Gisaway ni Senator-Judge Panfilo “Ping” Lacson ang sunod-sunod nga pakigpulong o manifestations sa iyang mga kaubang senator-judges nga wala’y direktang kalabutan sa impeachment trial ni Vice President Sara Duterte, ug gihangyo nga dili na unta malangan ang nagpadayong husay sa Senado tungod niini.
Gitumbok ni Lacson ang taas nga diskurso sa pipila ka mambabatas labot sa gipahibalo ni NBI Director Melvin Matibag nga imbestigasyon sa 2019 SEA Games sa wala pa kini nakatakdang motestigo batok kang Duterte. Matud ni Lacson, kini ang rason kon ngano nga mitaas ug nalangan ang pagdungog kagahapon bisan pa man og wala’y gipresentang testigo ang prosekusyon.
Gipasidan-an usab sa senador nga gisulayan na ang pasensya sa publiko nga nagsubay sa paglitis tungod sa mga mahatong pamahayag nga layo ra sa tinuod nga isyu sa impeachment. Gani, nagpasiaw pa si Lacson nga mas malipay pa ang mga nanonood kon duna’y moproposar og mosyon nga i-adjourn o undangon na lang ang pagdungog kaysa maminaw sa mga balik-balik nga diskurso.
Sa pikas bahin, gipasabot ni Impeachment Court Spokesperson Atty. Tony Reginald Tungol nga gitugutan sa korte ang maong mga pagpadayag isip pagtahod sa mga mambabatas, basta respetuhon lang ang gitagal nga oras. Matud ni Tungol, gikinahanglan kining balansehon tungod kay wala na’y laing higayon o plenaryo diin magkauban ang mga senador aron ipadangat ang maong sentimyento, nga kabahin usab sa ilang katungkulan sa pagpanalipod sa kredibilidad sa impeachment court.