Gibarugan ni Senator-Judge Panfilo Lacson nga dili mahimong isalikway sa impeachment court ang naglungtad nga balaod sa paghisgot sa hangyo nga maablihan ang mga tax records ni Bise Presidente Sara Duterte.
Matud ni Lacson, kinahanglan nga mosunod ang impeachment court sa mga rekisito sa National Internal Revenue Code (NIRC), lakip ang pagkuha og sinulat nga pagtugot gikan sa Presidente, sa dili pa maabli ang selyadong “green box” sa Bureau of Internal Revenue (BIR) nga naglangkob sa tax records sa Bise Presidente.
Dugang pa sa senador, nga ang iyang baruganan nakabase sa Rule of Law ug dili sa pagsuporta sa bisan unsang kampo sa impeachment trial.
Matud ni Lacson, dili mahimong basihan ang posibleng politikal nga interpretasyon sa mahimong desisyon sa Presidente kon mohatag kini og written authority, tungod kay ang labing importante mao ang pagsunod sa gikinahanglan sa balaod.