Naghangyo si National Bureau of Investigation (NBI) Director Melvin Matibag sa House prosecution panel nga ipasayo ang iskedyul sa iyang pagtestigo sa impeachment trial ni Bise Presidente Sara Duterte aron dili malangay ang pagdungog sa kaso.
Sa sulat nga iyang gipadala kang Lead Prosecutor ug Batangas Representative Gerville Luistro, sigon ni Matibag nga motambong siya sa usa ka summit sa mga law enforcement leaders sa Thailand sa Hulyo 21 ug 22, busa gihangyo niyang makatestigo sa Senado sa dili pa ang Hulyo 20.
Matud ni Matibag, siya mismo ang morepresentar sa NBI sa maong panagtigom uban sa mga opisyal sa Federal Bureau of Investigation (FBI) ug Royal Thai Police, diin hisgutan ang mga isyu sa scam ug transnational organized crime sa Asia-Pacific.
Tungod niini, gihangyo niya nga ma-una ang iyang testimonya aron dili maapektuhan ang dagan sa impeachment proceedings.
Gilauman nga maghatag si Matibag og testimonya kalabot sa imbestigasyon sa NBI sa giingong hulga ni VP Sara batok nila Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Ang maong alegasyon maoy usa sa mga nag-unang basehan sa Articles of Impeachment nga gisang-at batok sa Bise Presidente.