Nisilaob ang mainitong debate sa ika-limang (5th) adlaw sa impeachment trial ni VP Sara Duterte kagahapon kalabot sa kahulogan sa “grave threats” ug sa mga typographical errors sa dokumento sa NBI. Gidepensahan sa kampo sa bise nga tubag lamang sa Q&A sa presscon ug dili seryosong hulga ang iyang giluwatang pamahayag. Apan daling gisupak kini sa prosekusyon gamit ang desisyon sa Korte Suprema nga dili na kinahanglang mobati og kahadlok ang gihulga aron makonsiderar kining usa ka seryosong bahad.
Mikuwestiyon usab si Senator-Judge Pia Cayetano kon unsa ang kalainan sa “pahimangno” (warning) ug “hulga” (threat) sa maong diskusyon, apan dali kining gidepensahan ni NBI BARMM Regional Director Atty. Jeremy Lotoc .
Gigisa sa depensa ang NBI kalabot sa mga clerical ug typographical errors sa ilang dokumento aron kuwestiyonon ang due process. Apan daling gibarogan ni Atty. Jeremy Lotoc nga ang maong typo sa papel dili makapapas sa kamatuoran nga naglungtad ang video ug gihimo mismo sa bise presidente ang seryosong pagpanghulga.
Taliwala sa taas nga debate, prangkang nangutana si Senator-Judge Tito Sotto human matud pa “nasaag” na ang diskusyon sa isyu sa grave threats ug inciting to sedition nga alang man unta sa regular nga korte. Gipahinumdoman ni Sotto ang tanan nga ang impeachment court nagbista sa kasong “betrayal of public trust” (pagluib sa pagsalig sa publiko) ug dili ordinaryong kriminal nga kaso.