Nananawagan si Pope Leo XIV og dinalian nga dayalogo ug diplomasya aron paphaon ang gitawag niya nga “hangin sa gubat” nga kasamtangang nagdala og kagubot, kakuyaw, ug kamatayon sa Middle East, Ukraine, ug uban pang bahin sa kalibutan.
Gipahayag kini sa Santo Papa atol sa iyang pag-ampo sa Angelus niadtong Dominggo gikan sa balkonahe sa Apostolic Palace sa Castel Gandolfo, usa ka lungsod sa kabungtoran gawas sa Roma diin siya kasamtangang nagpahuway alang sa ting-init. Pinaagi niini, gibuhi pag-usab ni Pope Leo ang tradisyon sa bakasyon sa mga nangaging lider sa Simbahan nga una nang giundangan ni Pope Francis.
Gawas sa iyang panawagan ngadto sa mga lider sa kanasoran nga pilion ang malinawong negosasyon, gidasig usab ni Pope Leo ang mga magtutuo nga mogahin og mapuslanong mga gutlo sa kahilom ug pag-ampo karong panahon sa ting-init. Ang iyang mensahe natonong sa nagpadayong grabeng tensyon sa kalibutan, ilabi na sa bag-ohay lang nga nagka-init nga panagbangi tali sa Amerika ug Iran dapit sa Strait of Hormuz.