Gideklara sa nasod sa Iran nga hingpit na nilang gisirad-an ang Strait of Hormuz, usa ka labing importanteng agianan sa dagat alang sa patigayon sa lana ug gas sa tibuok kalibutan. Sumala sa pahayag gikan sa Revolutionary Guards sa Iran, gihimo nila ang maong lakang “hangtod sa dugang pahibalo” tungod sa giingong padayong pagpanghilabot sa Estados Unidos sa ilang rehiyon, human usab sa serye sa mga pagpamaril ug pag-atake sa mga komersyal nga barko sa maong dapit.
Apan daling gihimakak sa militar sa Amerika, partikular na ang US Central Command (CENTCOM), ang maong mga pamahayag sa pagsira. Nag-insistir ang US nga nagpabiling gawasnon, luwas, ug normal ang dagan sa trapiko sa mga barko sa maong dapit karon. Matod pa sa CENTCOM, ang Strait of Hormuz usa ka internasyonal nga agianan sa tubig busa andam kanunay ang ilang mga puwersa sa pagpanalipod sa kagawasan sa nabigasyon batok sa bisan unsang hulga gikan sa Iran.