Girekomenda sa Sangguniang Panlalawigan sa Bukidnon ang pag-aproba sa duha ka mga lokal nga balaodnon nga naglangkob sa pagsulbad sa mga panagbangi sa yuta (Land Dispute) sa lungsod sa Cabanglasan ug pagdugang sa gidaghanon sa mga motorized tricycle ug trycab for hire sa Lantapan, Bukidnon.
Atol sa sesyon niadtong Martes, gipresenta ni Second Legislative District Board Member Bobby Jay Dinlayan ang Committee Report No. 2026-U-12 ubos sa Committee on Land Use, Human Settlement, ug Agrarian Reform nga may kalabotan sa Ordinance No. 47-2026 sa Sangguniang Bayan sa Cabanglasan.
Ang maong ordinansa nagtinguha sa pagtukod og usa ka komprehensibong municipal framework alang sa pagpugong ug malinawon nga pagsulbad sa mga panagbangi sa yuta pinaagi sa mediation, inter-agency coordination, ug community-based mechanisms. Matud ni Dinlayan, human sa masusi nga pagrepaso sa komite, nasuta nga ang maong ordinansa nahiuyon sa katungod ug otoridad sa Sangguniang Bayan sa Cabanglasan sa paghimo og mga lakang alang sa kaayuhan sa mga residente.
Lakip usab sa mekanismo ang pagpalig-on sa barangay-level mediation, mas paspas nga koordinasyon uban sa mga ahensya sama sa Department of Environment and Natural Resources o DENR, Department of Agrarian Reform o DAR, Land Registration Authority o LRA, National Commission on Indigenous Peoples o NCIP, ug Philippine National Police o PNP.
Matud ni Dinlayan, ang maong inisyatibo nahiuyon sa mga nasudnong balaod sama sa Local Government Code, Alternative Dispute Resolution Act of 2004, ug Magna Carta of Women aron maseguro ang barato, malinawon, ug hapsay nga pagsulbad sa mga kaso sa yuta sa komunidad.