Naghatod og dako nga kalingawan ug emosyonal nga kahupayan ang Kapamilya actress nga si Francine Diaz ngadto sa mga estudyante ug magtutudlo sa San Jose National High School sa dakbayan sa Tacloban karong adlawa, Hulyo 6, duha ka semana human sa madugong pagpamusil sa maong tunghaan.
Ang pagbisita sa batan-ong aktres kabahin sa usa ka psychosocial support initiative sa kagamhanang lokal sa Tacloban ubos sa pamunoan ni Mayor Alfred Romualdez, inabagan sa Department of Education (DepEd). Gilingaw ug gidasig ni Francine ang tibuok tunghaan pinaagi sa pag-awit sa mga sikat nga kanta sama sa “Call Me Maybe” aron makuha ang grabeng kaguol sa mga kabataan.
Kahinumduman nga niadtong Hunyo 22, giuyog sa ngilngig nga trahedya ang maong eskwelahan diin tulo ka estudyante ang nakalas samtang 20 ka uban pa ang naangol human sila pamusila sa duha ka menor de edad. Pinaagi niining maong lakang sa musika ug kalingawan, naglaum ang DepEd ug ang LGU nga hinay-hinay nga maalim ang grabeng emosyonal nga trauma ug kahadlok nga nasinati sa tibuok komunidad sulod sa tulunghaan.