Bisan nagpadayon ang pagtubo sa ekonomiya sa nasud, daghang Pilipino ang wala pa gihapoy makabati sa kauswagan tungod sa kakuwang sa maayong panginabuhian ug oportunidad sa trabaho, matud sa financial analyst nga si Rogel Morales. Gipasabot niyang kinahanglan nga mas daghang lig-on nga trabaho ang mamugna aron tinuod nga mabati sa katawhan ang pag-uswag sa ekonomiya.
Subay niini, gipahayag usab ni Morales nga dili angay ikabalaka sa publiko ang pagsaka sa utang sa Pilipinas nga miabot sa P18.55 trilyon niadtong katapusan sa Mayo.
Matud niya, natural lamang ang pagsaka sa utang kon kini gigamit sa mga produktibong proyekto sama sa imprastraktura, edukasyon ug panglawas nga makatampo sa pagtubo sa ekonomiya.
Dugang pa niya, mas angay tutokan ang kapasidad sa nasud sa pagbayad sa utang ug ang debt-to-GDP ratio kaysa sa kinatibuk-ang kantidad niini.
Base sa Bureau of the Treasury, misaka ang pambansang utang ngadto sa P18.55 trilyon niadtong Mayo gikan sa P18.47 trilyon sa Abril.