Tingkagol sa prisohan ang usa ka 46-anyos nga drug personality human gikasahan og buy-bust operation sa Purok 11, Barangay Mailag, Valencia City, Bukidnon niadtong Hunyo 28 sa gabii.
Nailhan ang dinakpan nga si alyas “Tawe”, diin narekober gikan kaniya ang tulo ka sachet sa gisuhaang shabu nga motimbang og 5.2 gramos ug duna’y standard drug price nga P35,360. Nasakmit usab ang buy-bust money ug mga drug paraphernalia atol sa operasyon nga gipangunahan sa Valencia City Police Station ubos ni PLTCOL Bryan M. Panganiban kauban ang nagkadaiyang yunit sa kapulisan.
Giandam na sa mga otoridad ang saktong kaso batok sa suspetsado tungod sa paglapas sa Republic Act 9165 o Comprehensive Dangerous Drugs Act of 2002, samtang ang mga nakumpiskang ebidensya gipadala na sa Bukidnon Provincial Forensic Unit alang sa laboratory examination.