Pormal nang gi-turn over ang tulo ka proyekto sa water system nga adunay kinatibuk-ang kantidad nga hapit ₱25 milyon ngadto sa mga residente sa Barangay Kalagangan, Durian, ug Matupe sa San Fernando, Bukidnon.
Gilauman nga makatabang kini sa pagsulbad sa dugay nang problema sa suplay sa limpyo ug luwas nga tubig sa maong mga komunidad.
Ang pinakadako nga proyekto mao ang Level II Water System sa Barangay Kalagangan nga nagkantidad og ₱14.7 milyon, samtang ₱5 milyon matag usa ang gigahin alang sa Level III Water System sa Barangay Durian ug Barangay Matupe.
Ang pondo alang sa maong mga proyekto gikan sa opisina ni Congressman John Flores sa Ikaduhang Distrito sa Bukidnon.
Gitambongan ang turnover ceremony ni Congressman Flores uban sa ubang lokal nga mga opisyal ug mga representante sa 89th Infantry Battalion.