Duha ka kinabuhi ang nakalas sa managlahing vehicular accident nga natala sa probinsya sa Bukidnon niadtong Biyernes sa gabii.
Sa unang insidente nga nahitabo takna sa alas-7:58 sa gabii sa Purok 2, Barangay Libertad, Quezon, Bukidnon, dead on arrival sa Quezon Health Center Infirmary ang 23-anyos nga drayber sa usa ka Suzuki Raider 150 nga adunay plate number nga 999KUN.
Base sa inisyal nga imbestigasyon sa kapulisan, nagbangga ang maong motorsiklo ug usa ka Toyota Wigo nga adunay plate number KAI 4244 nga gimaneho sa usa ka 20-anyos nga lalaki. Giingong mi- encroach sa pikas lane ang drayber sa motorsiklo nga miresulta sa head-on collision.
Samtang, laing 33-anyos nga lalaki ang nakabsan usab sa kinabuhi human mibangga ang iyang gimanehong motorsiklo sa usa ka naka-park nga ten-wheeler truck sa Sitio Tamaingon, Barangay Cabadiangan, Kadingilan, Bukidnon, mga alas-9:15 sa gabii sa samang petsa.
Gibutyag sa mga otoridad nga giingong ilawom sa impluwensya sa makahubog nga ilimnon ang drayber sa motorsiklo ug wala niini nabantayan ang maong trak nga nakaparking sa kilid sa dalan hinungdan sa hinanaling kamatayon niini.