Gitawag nga “rehashed” sa House prosecution panel spokesperson Representative Zia Alonto Adiong ang tubag ni Vice President Sara Duterte sa Articles of Impeachment nga iyang giatubang.
Sa gisumiti nga 51-panid nga dokumento sa Bise Presidente, nga nag ingon nga walay bisa ang impeachment proceedings tungod kay gihimo matud pa kini nga adunay pagpihig ug “bad faith”.
Apan matod ni Adiong, nagpakita lamang kini nga walay lig-on nga kontra-ebidensya ang kampo sa Bise Presidente batok sa mga alegasyon.
Punto por punto nga gitubag ni Duterte ang upat ka Articles of Impeachment, lakip ang isyu sa giingong sayop nga paggamit sa confidential funds ug unexplained wealth.
Gibarugan usab niya nga dili pa mahimong gamiton batok kaniya ang mga Notice of Disallowance sa Commission on Audit tungod kay dili pa kini pinal.
Gipanghimakak usab niya ang alegasyon sa graft ug corruption ug giingong legal ang pagpagawas sa pondo.
Samatang ang giingong grave threats batok sa Presidente, gipasabot ni Duterte nga gigamit lamang niya ang iyang katungod sa freedom of expression ug wala siyay tuyo nga manamastamas o mameligro sa kinabuhi ni bisan kinsa.
Gitubag kini ni Adiong, nga walay absolute freedom of expression ug klaro kini direkta ang hulga nga gipadayag sa Bise Presidente, nga nasaksihan sa publiko pinaagi sa telebisyon.