Sikop sa magkalahing operasyon sa kapulisan ang tulo ka mga giilang Most Wanted Persons (MWP) sa lalawigan sa Bukidnon tungod sa nagkadaiyang bug-at nga kaso niadtong Hunyo 25.
Unang nasikop sa hiniusang pwersa sa Lantapan MPS, Malaybalay CPS, ug uban pang yunit didto sa Sitio Panamucan, Barangay San Jose, niining dakbayan si Winheart Longakit Simplon, 24 anyos. Si Simplon nalista isip Top 6 MWP sa city level ug nag-atubang og warrant of arrest alang sa kasong parricide (pagpatay sa kabanay) nga wala’y girekomendang pyansa.
Samtang sa laing bahin, natiklo sa mga personahe sa Damulog MPS didto sa Barangay Romagooc, Kibawe, si Joseph Pustanes, 28 anyos, kinsa giilang Top 2 MWP sa municipal level alang sa pagsilbi sa iyang sentensya tungod sa paglapas sa RA 9165 o Comprehensive Dangerous Drugs Act. Kadungan niini, nasikop usab sa Kitaotao MPS ug PDEA-10 si Rodillo Ramoso Wapen alyas “Kibong”, 51 anyos, kinsa nailang Top 6 MWP sa lungsod human nakuhaan og warrant sa susamang kaso sa ilegal nga druga diin duna kini girekomendang pyansa nga P120,000. Ang mga dinakpan anaa na sa kustodiya sa kapulisan alang sa saktong disposisyon.