Hugpong sa malampusong operasyon batok sa ilegal nga druga ang gilusad sa kapulisan sa lungsod sa Don Carlos, Maramag, ug Quezon, Bukidnon nga miresulta sa pagkasikop sa tulo ka mga bag-ong nailhang drug personalities ug pagkasakmit sa kapin P72,000 nga bili sa shabu.
Didto sa lungsod sa Don Carlos, malampusong natiklo sa mga otoridad sa Purok 7, Barangay Norte si alyas “Tanloy,” 21 anyos, human kini makuhaan og tulo ka sachet sa gituohang shabu nga motimbang og 1.50 gramos ug nagbalor og P10,200, lakip na ang P500 nga buy-bust money.
Samtang sa pikas bahin, malampuson usab nga nadakpan sa Maramag MPS didto sa South Poblacion si alyas “Bobong,” 43 anyos, human makuhaan og siyam ka sachet sa shabu nga nagbalor og P20,400. Apan daling nakaeskapo ug kasamtangan karong gipangita sa mga otoridad ang iyang igsoon nga nailang si alyas “Jun-jun.”
Kadungan niini, laing 49-anyos nga lalaki ang nagtingkagol sa prisohan human gikasahan og buy-bust sa Quezon MPS didto sa Poblacion sa maong lungsod. Narekober sa maong biktima ang pito ka sachet sa shabu nga mitala og 6.2 gramos ug nagbalor og P42,160, lakip ang usa ka Suzuki Multicab pick-up nga gigamit sa operasyon. Ang tanang mga dinakpan nag-atubang na karon og kasong paglapas sa RA 9165 o Comprehensive Dangerous Drugs Act