Nag-atubang karon og water shortage o kakulang sa panubig ang katawhan sa dakbayan sa Malaybalay.
Sa pakighinabi sa Bombo Radyo Malyabay, gibutyag ni Pio Masepequiña, ang Kapitan sa Barangay Zamboanguita, nga kini ang nag-una ug labing dako nga suliran nga gisulayan ug gipaningkamotan karon nga mahatagan og dinalian nga kasulbaran sa ilang dapit.
Gipadayag sa kapitan, giisip nila kini nga seryosong problema tungod kay apektado ang matag adlaw nga panginahanglanon sa mga residente.
Isip dinalian nga tubag sa nagpadayong hagit sa water shortage, ginalantaw karon sa kagamhanan sa maong ang pagpatukod og deep well o artesian well aron masulbad ang kakulangon sa suplay sa panubig sa ilang dapit.
Bisan pa man sa maong inisyatibo nga pagtukod og deep well, gikabalak-an gihapon kini gumikan hinay-hinay na usab nga nihubas ang kasamtangang tinubdan alang sa maong proyekto.
Dugang pa sa kapitan, duna na sila’y mga nag-eksister nga free flow nga sistema sa tubig sa ilang barangay apan gumikan sa grabeng init o El Niño, nakita nga miubos ug padayon na nga nag-anam og kahubas ang agos niini.