Giandam na karon sa lokal nga kagamhanan sa Barangay Zamboanguita ug sa City Engineering Office ang dinalian nga implementasyon sa ₱4.5 milyones nga deep well project aron masulbad ang nagkagrabe nga kakulang sa suplay sa tubig sa maong dapit.
Sa pakighinabi sa Bombo Radyo Malaybalay ngadto kang Barangay Captain Pio Masepequiña, iyang gipadayag nga dugay na nilang gisagubang ang maong suliran human nangahubas ang ilang mga spring sources o tuburan bisan duna’y gigahin nga pondo kaniadto. Sa kasamtangan, napugos ang barangay sa pagpatuman og water scheduling o rasyon sa tubig, apan duna gihapo’y mga panimalay ang dili maabtan gumikan sa kanihit sa suplay—usa ka sitwasyon nga gikaduhang mosamot kon mosulod ang gilauman nga Super El Niño.
Bisan pa og mas dako ang magasto sa kuryente ug maintenance, gitino sa kapitan nga ang deep well na ang ilang kataposang saliganan aron mahatagan og dinalian nga solusyon ang komunidad. Human sa gihisgutang final survey sa City Engineering Office, nagpaabot na lamang karon sa hingpit nga pagasugdan ang maong proyekto dungan sa pagpasalig nga dili maapektuhan ang uban pang imprastraktura sama sa farm-to-market roads sa maong barangay