Miusos ngadto sa tulo (3) lamang ka insidente sa sunog ang natala sa Bureau of Fire Protection (BFP) sa lungsod sa Cabanglasan sulod sa unang unom ka bulan ning tuig 2026.
Sa pakighinabi sa Bombo Radyo Malaybalay ngadto kang SFO2 Oscar B. Culita, ang Deputy Fire Marshal sa BFP-Cabanglasan, iyang gibutyag nga kasagaran sa maong mga sunog nagsugod sa kusina o kitchen fires. Sa maong ihap, usa lamang ang natala nga naangol human madamay sa kalayo niadtong Abril 16, samtang swerteng ubos ra usab ang kantidad sa kinatibuk-ang danyos sa mga kabtangan.
Taliwala sa maong maayong rekord, hugot gihapon nga giawhag sa BFP ang publiko nga dili magkompiyansa ug likayan ang pataka nga pagsunog sa mga sagbot o kaingin sa umahan tungod sa risgo sa pagkaylap sa kalayo ilabi na nga nagkainit ang panahon. Pahinumdom pa sa buhatan, ugat sa kaluwasan ang pag-unplug sa mga kuryente ug dili pagbiya sa gilutoan kon molakaw sa balay.