Hingpit nga gipahinumdoman sa Protected Area Management Office (PAMO)–Mt. Kalatungan Range Natural Park ang tanang mga mountaineers ug hikers nga seryosong mosunod sa opisyal nga permit process sa dili pa mosaka sa maong protected area.
Sa pakighinabi sa Bombo Radyo Malaybalay ngadto kang Protected Area Superintendent Roy R. Aguanta, iyang gipatin-aw nga kinahanglan magparehistro ug magpa-book ang mga climbers sa Municipal Tourism Office labing menos tulo ka adlaw sa dili pa ang target nga pagsaka. Gawas sa ipahigayon nga orientation, kinahanglan duna sila’y kauban nga accredited guide ug moagi sa tradisyonal nga ritwal sa pagpangayo og pagtugot gikan sa komunidad sa mga kaigsoonang Lumad (IPs).
Luyo niini, gipasigarbo ni Aguanta nga nagpabilin nga “zero” o walay natala nga kaso sa illegal climbing sa bukid. Kini gumikan sa estrikto ug hugot nga koordinasyon sa PAMO, mga LGU, ug sa mga mabinantayong lumad nga nagabantay sa tanang entry ug exit points sa Mt. Kalatungan alang sa usa ka luwas ug responsableng ecotourism.