Miuswag na ang pre-trial proceedings sa impeachment case ni Vice President Sara Duterte human masumite sa prosecution panel ug defense panel ang ilang tagsa-tagsang pre-trial briefs ngadto sa Senado.
Gikumpirma ni Senate Secretary Renato Bantug nga nadawat na sa Senado ang mga dokumento niadtong miaging adlaw isip kabahin sa pormal nga proseso sa pag-andam alang sa impeachment trial.
Samtang sa kampo sa depensa, gipadayag ni Atty. Michael Poa, legal counsel ni Vice President Sara Duterte, nga nasumite na usab sa Senado ang ilang pre-trial brief nga adunay kapin sa 60 ka panid.
Bisan wala niini gibutyag ang tibuok sulod sa dokumento, matud ni Poa nga nalakip kini og mga lista sa mga testigo nga ipresentar sa depensa atol sa impeachment trial, ingon man ang uban pang mahinungdanong mga isyu nga may kalabutan sa pagdungog sa kaso.