Mikabat sa P1.434 trilyon ang kinatibuk-ang kita nga nakolekta sa Bureau of Internal Revenue (BIR) gikan Enero hangtud Mayo 2026, mas taas og P74.582 bilyon o 5.49 porsyento kumpara sa samang panahon sa miaging tuig.
Niadtong Mayo lamang, mikolekta ang BIR og P279.1 bilyon, nga mas taas og 14.15 porsyento kumpara sa Mayo 2025 ug labaw usab sa gitakdang target sa ahensya.
Sumala ni BIR Commissioner Charlito Martin Mendoza, nakatampo sa maong resulta ang gipalawig nga filing season ug ang kooperasyon sa mga magbubuhis.
Matud pa niini, ang extension nga gihatag ni Presidente Ferdinand Marcos Jr. nakahatag og dugang panahon sa mga taxpayer aron makahuman sa pag-file ug pagbayad sa buhis taliwala sa energy crisis.
Gipasabot usab ni Mendoza nga nakatabang sa pagtaas sa koleksyon ang mga reporma ubos sa BIR DARES agenda, lakip ang Taxpayer Portal ug QR-enabled Certificate of Registration alang sa online businesses.