Nag-viral karon si Yingzi, usa ka 74-anyos nga babaye gikan sa China nga adunay kapin duha ka milyon ka followers sa social media, tungod sa iyang batan-on nga panagway ug aktibong estilo sa kinabuhi.
Kanunay siyang naga-post og mga video diin makita siyang nagsayaw sa kalsada nga nagsul-ob og high heels ug nagpa-pose nga puno sa pagsalig sa kaugalingon.
Tungod niini, daghan ang na-inspire sa iyang positibo nga panglantaw sa kinabuhi ug kusog nga kumpiyansa bisan sa iyang edad.
Matud ni Yingzi, numero lamang ang edad, ug mas importante ang pagpabiling batan-on sa hunahuna ug adunay pagsalig sa kaugalingon.
Gihulagway niya nga ang yawe sa iyang kahimsog mao ang disiplinadong pagkinabuhi.
Dili siya mokaon human sa alas singko sa hapon, kanunay siyang nagpili og masustansiyang pagkaon sama sa mga gulay, sabaw, ug protina, ug naga-yoga matag buntag.
Sukad pa sa iyang kabatan-onan, interesado na siya sa fashion ug beauty.
Nakatrabaho usab siya kaniadto sa Japan ug nakapanag-iya og kaugalingong Chinese restaurant sa wala pa siya mibalik sa China.
Niadtong 2022, sa edad nga 70 anyos, miapil siya sa fashion group nga “Beijing Fashion Grandmas” ug nakalakat pa sa runway sa Shanghai Disneyland isip modelo.
Ang iyang mensahe sa tanan mao nga dili babag ang edad sa pagtagamtam sa kinabuhi.
Hinuon, usa kini ka oportunidad aron magpabiling aktibo, himsog, ug mas makaila pa sa kaugalingon.