Gipangita na karon sa kapulisan ang usa ka 33-anyos nga lalaki human niini gidunggab ang usa ka tag-iya og tindahan nga miulang lang unta sa usa ka lalis didto sa Purok 3-A, Barangay Kahaponan, Valencia City, niadtong Martes, Hunyo 9.
Subay sa imbestigasyon sa Valencia City Police Station, nagdula og bilyar ang suspek uban sa usa ka barangay kagawad sa tindahan sa 49-anyos nga biktima sa dihang aksidenteng nadaot niini ang motorsiklo sa laing tawo. Mitunga ang biktima aron pakalmahon ang sitwasyon ug gimandoan ang suspek nga mouli na lang tungod kay pwerte na niining huboga.
Apan imbes nga maminaw, mibalik ang suspek human sa pipila ka minuto bitbit ang kutsilyo ug kalit nga gidunggab sa makaduha ka higayon ang biktima, diin nagtabisay ang dugo sa wala niining kamot. Paspas nga miikyas ang suspek sa wala masayrang direksyon human sa krimen, samtang dinalian sab nga gidala ang biktima sa La Viña Hospital aron madapatan og dinaliang tambal. Sa kasamtangan, nagpadayon ang hot pursuit operation sa Valencia CPS aron hingpit nga matiklo ang maong suspetsado.